గద్యాలు
శ్రీ లక్ష్మీ గద్యం, శ్రీ శివ గద్యం, శ్రీ శ్రీనివాస గద్యం — పూర్తి పాఠం. ఎడమవైపు గద్యాన్ని ఎంచుకుంటే కుడివైపు పాఠం కనిపిస్తుంది.
శ్రీ లక్ష్మీ గద్యం
శ్రీరంగసూరిణేదం శ్రీశైలానంతసూరివంశ్యేన । భక్త్యా రచితం గద్యం లక్ష్మీః పద్మావతీ సమాదత్తాం ॥
శ్రీవేంకటేశమహిషీ శ్రితకల్పవల్లీ పద్మావతీ విజయతామిహ పద్మహస్తా । శ్రీవేంకటాఖ్య ధరణీభృదుపత్యకాయాం యా శ్రీశుకస్య నగరే కమలాకరేభూత్ ॥
భగవతి జయజయ పద్మావతి హే !
భాగవత నికర బహుతర భయకర బహుళోద్యమయమ సద్మాయతి హే !
భవిజన భయనాశి భాగ్య పయోరాశి వేలాతిగ లోల విపులతరోల్లోల వీచి లీలావహే !
పద్మజభవ యువతి ప్రముఖామర యువతి పరిచారక యువతి వితతి సరతి సతత విరచిత పరిచరణ చరణాంభోరు హే !
అకుంఠవైకుంఠ మహావిభూతి నాయికే !
అఖిలాండకోటిబ్రహ్మాండ నాయికే !
శ్రీవేంకటనాయికే !
శ్రీ పద్మావతి !
జయ విజయీ భవ !
క్షీరాంభోరాశి సారైః ప్రభవతి రుచిరైర్యత్స్వరూపే ప్రదీపే శేషాణ్యేషామృజీషాణ్య జనిషత సుధాకల్ప దేవాంగనాద్యాః । యస్యాస్సింహాసనస్య ప్రవిలసతి సదా తోరణం వైజయంతీ సేఽయం శ్రీవేంకటాద్రి ప్రభువర మహిషీ భాతు పద్మావతీ శ్రీః ॥
జయ జయ జయ జగదీశ్వర కమలాపతి కరుణారస వరుణాలయ వేలే !
చరణాంబుజ శరణాగత కరుణారస వరుణాలయ మురబాధన కరబోధన సఫలీకృత శరణాగత జనతాగమ వేలే !
కించిదుదంచిత సుస్మిత భంజిత చంద్రకలామద సూచిత సంపద విమల విలోచన జిత కమలాసన సకృదవలోకన సజ్జన దుర్జన భేదవిలోపన లీలా లోలే !
శోభనశీలే !
శుభగుణమాలే !
సుందరభాలే !
కుటిల నిరంతర కుంతల మాలే !
మణివర విరచిత మంజుళ మాలే !
పద్మసురభి గంధ మార్దవ మకరంద ఫలితాకృతి బంధ పద్మినీ బాలే !
అకుంఠ వైకుంఠ మహావిభూతి నాయికే !
అఖిలాండకోటిబ్రహ్మాండ నాయికే !
శ్రీవేంకటనాయికే !
శ్రీ పద్మావతి !
జయ విజయీభవ !
శ్రీశైలానంతసూరేస్సధవముపవనే చోరలీలాం చరంతీ చాంపేయే తేన బద్ధా స్వపతిమవరయత్ తస్య కన్యా సతీ యా । యస్యాః శ్రీశైలపూర్ణశ్శ్వశురతి చ హరేస్తాత భావం ప్రపన్నః సేఽయం శ్రీ వేంకటాద్రి ప్రభువర మహిషీ భాతు పద్మావతీ శ్రీః ॥
ఖర్వీ భవదతి గర్వీ కృత గురు మేర్వీ శిగిరి ముఖోర్వీధర కుల దర్వీకర దయితోర్వీధర శిఖరోర్వీ ఫణిపతి గుర్వీఖర కృత రామానుజముని నామాంకిత బహు భూమాశ్రయ సుర ధామాలయ వర నందనవన సుందర తరానంద మందిరానంత గురు వనానంతకేలియుత నిభృతతర విహృతి రత లీలా చోర రాజ కుమార నిజపతి స్వైర సహ విహార సమయ నిభృతోషిత ఫణిపతి గురు భక్తి పాశ వశంవద నిగృహీతా రామ చంపక నిబద్ధే !
భక్త జనావన బద్ధ శ్రద్ధే !
భజన విముఖ భవిజన భగవద్ ఉపసదన సమయ నిరీక్షణ సంతత సన్నద్ధే !
భాగధేయ గురు భవ్య శేష గురు బాహుమూలధృత బాలికా భూతే !
శ్రీ వేంకటనాథ వర పరిగృహీతే !
శ్రీ వేంకటనాథ తాత భూత శ్రీశైలపూర్ణ గురు గృహస్నుషా భూతే !
అకుంఠ వైకుంఠ మహావిభూతి నాయికే !
అఖిలాండకోటి బ్రహ్మాండ నాయికే !
శ్రీ వేంకట నాయికే !
శ్రీ పద్మావతి !
జయ విజయీ భవ !
శ్రీశైలేకేలి కాలే ముని సముపగమే యా భయాత్ ప్రాక్ ప్రభాతా తస్యైవోపత్యకాయాం తదనుశుకపురే పద్మకాసార మధ్యే । ప్రాదుర్భూతారవిందే వికచ దళ చయే పత్యురుగ్రైస్తపోభిః సేఽయం శ్రీ వేంకటాద్రి ప్రభువర మహిషీ భాతు పద్మావతీ శ్రీః ॥
భద్రే !
భక్త జనావన నిర్నిద్రే !
భగవద్ దక్షిణ వక్షో లక్షణ లాక్షా లక్షిత మృదుపదముద్రే !
భంజిత భవ్య నవ్యదర దలిత దల మృదుల కోకనదమద విలసదధరోర్ధ్వ విన్యాస సవ్యాప సవ్యకర విరాజదనితర శరణ భక్త గణ నిజచరణ శరణీకరతా భయ వితరణ నిపుణ నిరూపణ నిర్నిద్ర ముద్రే !
ఉల్లసదూర్ధ్వ తరా పరకర శిఖర యుగళ శేఖర నిజ మంజీమ మద భంజన కుశల వచన విధుమండల విలోకన విదీర్ణ హృదయతా విభ్రమ ధరధర విదలిత దల కోమల కమల ముకుల యుగళ నిరర్గల వినిర్గలత్ కాంతి సముద్రే !
శ్రీవేంకట శిఖర సహ మహిషీ నికర కాంత లీలావసర సంగత ముని నికర సముదిత బహులతర భయలసదపసార కేలి బహుమాన్యే !
శ్రీశైలాధీశ రచిత దినాధీశ బింబ రమాధీశ విషయ తపోజన్యే !
శ్రీశైలాసన్న శుకపురీ సంపన్న పద్మసర ఉత్పన్న పద్మినీ కన్యే !
పద్మసరోవర్య రచిత మహాశ్చర్య ఘోర తపశ్చర్య శ్రీక మునిధుర్య కామిత వదాన్యే !
మానవ కర్మజాల దుర్మల మర్మ నిర్మూలన లబ్ధ వర్ణ నిజ సలిలజ వర్ణ నిర్జిత దుర్వర్ణ వజ్ర స్ఫటిక సవర్ణ సలిల సంపూర్ణ సువర్ణ ముఖరీ సైకత సంజాత సంతత మకరంద బిందు సందోహ నిష్యంద సందానితా మందానంద మిలింద వృంద మధురతర ఝంకార ఖరుచిర సంతత సంఫుల్ల మల్లీ మాలతీ ప్రముఖ వ్రతతి వితతి కుంద కురవక మరూవక దమనకాది గుల్మ కుసుమ మహిమ ఘమఘమిత సర్వ దిఙ్ముఖ సర్వతో ముఖ మహనీయా మందమాకందా విరల నారికేల నిరవధిక క్రముక ప్రముఖ తరునికర వీధి రమణీయ విపుల తటోద్యాన విహారిణి !
మంజులతర మణి హారిణీ !
మహనీయ తర మణిజిత తరణి మకుట మనోహారిణి !
మంథరతర సుందరగతి మత్త మరాళ యువతి సుగతి మదాపహారిణి !
కలకంఠ యువాకుంఠ కంఠనాద కల వ్యాహారిణి !
అకుంఠ వైకుంఠ మహావిభూతి నాయికే !
అఖిలాండ కోటి బ్రహ్మాండ నాయికే !
శ్రీవేంకటనాయికే !
శ్రీ పద్మావతి !
జయ విజయీ భవ !
యాం లావణ్య నదీం వదంతి కవయః శ్రీమాధవాంభో నిధిం గచ్ఛంతీం స్వవశం గతాంశ్చ తరసా జంతూన్నయంతీమపి । యస్యా మానన నేత్ర హస్తచరణాద్యంగాని భూషారుచీ అంభోజాన్య మలోజ్జ్వలం చ సలిలం సా భాతు పద్మావతీ ॥
అంభోరుహవాసిని !
అంభోరుహాసన ప్రముఖాఖిల భూతానుశాసిని !
అనవరతాత్మనాథ వక్షః సింహాసనాధ్యాసిని !
అంఘ్రియుగావతార పథ సంతత సంగాహమాన ఘోరతరా భంగుర సంసార ఘర్మ సంతప్త మనుజ సంతాప నాశిని !
బహుల కుంతల వదన మండల పాణిపల్లవ రుచిర లోచన సుభగ కంధరా బాహు వల్లికా జఘన నితంబ మండలమయ వితత శైవాల సంఫుల్ల కమల కువలయ కంబుకమలినీ నాలోత్తుంగ విపుల పులిన శోభిని !
మాధవ మహార్ణవ గాహిని !
మహిలావణ్య మహా వాహిని !
ముఖ చంద్ర సముద్యత భాలతల విరాజమాన కించిదుదంచిత సూక్ష్మాగ్ర కస్తూరీ తిలక శూల సముద్భూత భీతి విశీర్ణ సముజ్ఝిత సంముఖభాగ పరిసర యుగళ సరభస విసృమర తిమిర నికర సందేహ సందాయి ససీమంత కుంతల కాంతే !
స్ఫటిక మణిమయ కందర్ప దర్పణ సందేహ సందోహి సకల జన సంమోహి ఫలఫల విమల లావణ్య లలిత సతత ముదిత ముదిత ముఖ మండలే !
మహిమ మ్రదిమ మహిమ మందహాసా సహిష్ణు తదుదయ సముదిత క్లమోదీర్ణారుణ వర్ణ విభ్రమద విడంబిత పరిణత బింబ విద్రుమ విలసదోష్ఠ యుగళే !
పరిహసిత దరహసిత కోకనద కుందరద మందర తరోదుగత్వర విసృత్వర కాంతి వీచి కమనీయామంద మందహాస సదన వదనే !
సముజ్జ్వలతరమణి తర్జిత తరణి తాటంక నిరాటంక కందలిత కాంతిపూర కరంబిత కర్ణ శష్కులీ వలయే !
బహిరుప గతస్ఫురణాధి గతాంతరంగణ భూషణగణ వదన కోశ సదన స్ఫటిక మణిమయ భిత్తి శంకాంకురణ చణ ప్రతిఫలిత కర్ణపూర కర్ణావతంస తాటంక కుండల మండన నిగనిగాయమాన విమల కపోల మండలే !
నిజ భ్రుకుటీ భటీ భూత త్ర్యక్షాష్టాక్ష ద్వాదశాక్ష సహస్రాక్ష ప్రభృతి సర్వ సుపర్వ శోభన భ్రూమండలే !
నిటల ఫలక మృగ మద తిలకచ్ఛల విలోకకలోక విలోచన దోష విరచిత విదలన వదన విధుమండల విగళిత నాసికా ప్రణాలికా నిగూఢ విస్తృత నాసాగ్ర స్థూల ముక్తా ఫలచ్ఛలాభి వ్యక్త వదన బిల నిలీన కంఠనాలి కాంతః ప్రవృత్త గ్రీవా మధ్యోచ్చ భాగకృత విభాగ గ్రీవాగర్త వినిస్సృత పృథుల విలసదురోజ శైలయుగళ నిర్ఝర ఝరీభూత గంభీరనాభి హ్రదావగాఢ విలీన దీర్ఘతర పృథుల సుధాధారా ప్రవాహ యుగళ విభ్రమాధారా విస్పష్ట వీక్ష్యమాణ విశుద్ధ స్థూల ముక్తాఫల మాలా విద్యోతిత దిగంతరే !
సకలాభరణ కలా విలాసకృత జంగమ చిరస్థాయి సౌదామనీ శంకాంకురే !
కనక రశనా కింకిణీ కల నాదిని !
నిజ జనతా గుణ నిజపతి నికట నివేదిని !
నిఖిల జనా మోదిని !
నిజపతి సంమోదిని !
మంథర తరమేహి !
మందమి మమ వేహి !
మయిమన ఆధేహి !
మమ శుభమస్యేహి !
మంగళ మయి భాహి !
అకుంఠ వైకుంఠ మహావిభూతి నాయికే !
అఖిలాండకోటి బ్రహ్మాండ నాయికే !
శ్రీవేంకటనాయికే !
శ్రీ పద్మావతి !
జయ విజయీ భవ !
జీయాచ్ఛ్రీ వేంకటాద్రి ప్రభువర మహిషీ నామ పద్మావతీ శ్రీః జీయాచ్చాస్యాః కటాక్షామృత రస రసికో వేంకటాద్రేరధీశః । జీయాచ్ఛ్రీవైష్ణవాలీ హత కుమతకథా వీక్షణైరేతదీయైః జీయాచ్చ శ్రీశుకర్షేః పురమనవరతం సర్వ సంపత్సమృద్ధం ॥
॥ ఇతి శ్రీలక్ష్మీగద్యం సమాప్తం ॥